Poslovne vijesti - Makedonija

Влошен квалитетот на водата во акумулацијата ХС "Лисиче"

Поради нерешениот проблем со отпадните води и фекалиите од селата Горно и Долно Јаболчиште, кои преку реката Тополка се влеваат во акумулацијата ХС Лисиче", квалитетот на водата е значително намален.

Непријатната вест на жителите на Велес и приградските населби Оризари, Превалец и Речани им ја соопштија од Заводот за здравствена заштита во Велес, кој редовно го испитува квалитетот на водата од акумулацијата.

- Точно е. За разлика од пред неколку години, квалитетот на водата во акумулацијата е влошен. Отпадните води и фекалиите од над 3.000 жители од Горно и Долно Јаболчиште и Дреново ја влошуваат состојбата на водата. Решение е изградба на пречистителна станица. Ние како Завод ова го велиме уште од почетокот. Доколку во скоро време не биде направена пречистителна станица состојбата уште повеќе ќе се влоши - вели д-р Флора Шурбановска, директор на Заводот за здравствена заштита во Велес.

Од Заводот велат дека моментно квалитетот на водата што ја пијат велашани е добар. Проблем беше во деновите кога нивото на акумулацијата поради високите температури, беше значително намалена и кога вода се испушташе од долниот дел каде што фекалиите се наталожени.

- За среќа овој период беше многу краток и не дозволивме жителите да пијат загадена вода - вели Шурбановска.

Наспроти Заводот, директорот на ХС Лисиче", Бобан Пановски за ВЕЧЕР изјави дека состојбата со водата не е алармантна.

- Велешани пијат здрава вода. Редовно се вршат анализи. Нормално е во ваква акумулација да се јавуваат временски промени на квалитетот на водата - вели Пановски.

Меѓутоа, проблемот останува и бара итно решение. Него го знаат и општина Велес и ХССЛисичее, па и повисоките органи во државава. Општината која преку ЈКППДервенн врши снабдување на населението со вода за пиење, и ХССЛисичее, кое пак, стопанисува со браната, немаат ниту сили ниту можности сами да го решат овој проблем кој станува се посериозен. И едните и другите немаат пари за изградба на пречистителна станица кај селото Долно Јаболчиште преку која би ги пречистувале отпадните води и од двете села што сега непречено, преку реката Тополка, се влеваат во акумулацијата. Пари нема ниту општина Чашка, на чија што територија се наоѓа браната и од која земјоделците наводнуваат повеќе од илјада хектари плодно земјиште.

- Наредната година со помош на Владата ќе биде подготвена студија да се изгради колектор за отпадните води за Горно и Долно Јаболчиште, или пак, да се изгради пречистителна станица - вели Пановски.